Terms
Loom contracts with brands and with creators separately, and the two never contract with each other. These are the two agreements.
ASCENDIA LABS LLC — КОНТЕНТ БҮТЭЭГЧИЙН ҮЙЛЧИЛГЭЭНИЙ НӨХЦӨЛ (CREATOR TERMS OF SERVICE)
Үйлчилгээ үзүүлэгч: ASCENDIA LABS LLC
Регистрийн дугаар: 7332641
Хаяг: Монгол Улс, Улаанбаатар хот, Сүхбаатар дүүрэг, 5-р хороо, 5-р хороолол, ТК30-21
Холбоо барих: founder@loom.mn
Энэхүү баримт бичигт "Ascendia Labs", "Loom", "Үйлчилгээ үзүүлэгч" эсхүл "Бид" гэж "Асендиа Лабс" ХХК-ийг; "Та" эсхүл "Бүтээгч" гэж Loom платформ болон үйлчилгээгээр дамжуулан контент бэлтгэх, нийтлэх ажлын санал хүлээн авч буй хувь хүн эсхүл хуулийн этгээдийг ойлгоно.
1. ЕРӨНХИЙ ЗҮЙЛ
1.1. Энэхүү үйлчилгээний нөхцөл нь Loom болон Таны хооронд байгуулагдах цахим гэрээ мөн. Та бүртгэлээ баталгаажуулахдаа энэхүү нөхцөлийг хүлээн зөвшөөрснөөр гэрээ хүчин төгөлдөр болно.
1.2. Хүлээн зөвшөөрсөн өдөр, цаг, нөхцөлийн хувилбар болон Таны уншсан бүрэн эх бичвэрийг Loom цахимаар хадгална. Та хүлээн зөвшөөрсөн бичвэрээ хэдийд ч дахин унших, нягтлах боломжтой.
1.3. Loom бол Таны гэрээний нөгөө тал юм. Та брэндтэй биш, Loom-той гэрээ байгуулж байна. Брэндтэй холбоотой аливаа асуудлыг Loom хариуцан шийдвэрлэнэ.
1.4. Энэхүү гэрээ нь хөдөлмөрийн гэрээ биш ба хараат бус гүйцэтгэгчийн хэлцэл болно. Та Loom-ийн ажилтан болохгүй бөгөөд Хөдөлмөрийн тухай хууль энэхүү харилцаанд үл хамаарна. Та ажлаа хэрхэн, хаана гүйцэтгэхээ өөрөө бие даан шийдвэрлэнэ.
1.5. Энэхүү гэрээ Танд онцгой эрх олгохгүй (non-exclusive). Та бусад гуравдагч захиалагч, брэндтэй бие даан ажиллах эрхтэй хэвээр байна.
2. АЖЛЫН САНАЛ
2.1. Loom Танд ажлын санал илгээнэ. Та ажилд тусгайлан өргөдөл гаргах шаардлагагүй.
2.2. Санал бүр дараах зүйлийг заана: Аль брэндийн ямар кампанит ажил болох, Таны авах шан хөлсний дүн, эхний бичлэгээ хүргүүлэх өдөр, нийтлэл нийтлэгдсэн байх эцсийн өдөр.
2.3. Loom Танд Instagram-ийн шууд мессеж (DM) эсхүл Системээр дамжуулан мэдэгдсэн цагаас эхлэн 48 цагийн дотор Та саналыг хүлээн авах эсэхээ хариулна. Мэдэгдэл хүргэгдээгүй бол уг хугацаа эхлэхгүй.
2.4. 48 цагийн дотор хариу өгөөгүй бол саналыг татгалзсанд тооцно. Үүнээс Танд ямар нэг хариуцлага үүсэхгүй бөгөөд дараагийн санал хүлээн авахад сөргөөр нөлөөлөхгүй.
2.5. Саналыг хүлээн авахдаа Та шан хөлсөө хүлээн авах өөрийн банкны дансны мэдээллийг оруулах шаардлагатай. Дансны мэдээлэлгүйгээр саналыг хүлээн авах боломжгүй.
2.6. Та нэгэн зэрэг хэд хэдэн ажил гүйцэтгэж болно. Ажил бүр өөрийн гэсэн хугацаа, шан хөлстэй бөгөөд бие даан тооцогдоно.
3. АЖЛАА ГҮЙЦЭТГЭХ
3.1. Loom Танд даалгавар (Brief)-ыг илгээнэ. Даалгаварт санаа, заавал хэлэх үг, хийх ба хийхгүй зүйлийн жагсаалт, заавал дурдах нэр, хаштаг (#) багтана.
3.2. Та эхний бичлэгээ саналд заасан өдөр буюу нийтлэл нийтлэгдэх эцсийн өдрөөс 9 хоногийн өмнө Loom-д хүргүүлнэ.
3.3. Брэнд бичлэгт засвар хүсэх эрхтэй. Засвар нь ажлын салшгүй хэсэг бөгөөд түүнд нэмэлт шан хөлс төлөгдөхгүй.
3.4. Брэнд бичлэгийг хүлээн авч баталгаажуулсны дараа Та 72 цагийн дотор өөрийн Instagram хуудсанд нийтэлнэ.
3.5. Нийтлэлийг доод тал нь 7 хоногийн турш нийтэд нээлттэй байлгана. Энэ хугацаанд нийтлэлээ устгах, нуух, архивлах, эсхүл хаах эрхгүй.
4. ЗАР СУРТАЛЧИЛГААГ ИЛЭРХИЙЛЭХ ЖУРАМ
4.1. Таны нийтлэл нь зар сурталчилгаа мөн. Зар сурталчилгааны тухай хуульд заасны дагуу сурталчилгаа нь агуулга, хэлбэр, түүнийг түгээж байгаа арга хэрэгслээс үл хамааран зар сурталчилгаа гэж ойлгогдохоор байх ёстой.
4.2. Ийм учраас Та нийтлэлдээ Instagram-ийн "Төлбөрт түншлэл" (Paid Partnership) тэмдэглэгээг ашиглах, эсхүл тайлбартаа энэ нь төлбөрт зар сурталчилгаа болохыг тодорхой бичнэ (#Ad, #PaidPartnership гэх мэт).
4.3. Уг тэмдэглэгээг нийтлэл нээлттэй байх бүх хугацаанд хэвээр үлдээнэ.
4.4. Бүтээгдэхүүний талаарх мэдэгдлийн үнэн зөв байдлыг брэнд хариуцна. Та даалгаварт байхгүй худал эсхүл хэтрүүлэгтэй мэдэгдлийг өөрөө нэмж хэлэхгүй.
5. ШАН ХӨЛС БОЛОН ТӨЛБӨР
5.1. Таны шан хөлсийг саналд заасан бөгөөд Та саналыг хүлээн авсан мөчид эцэслэн тогтоно. Үүний дараа тухайн ажлын шан хөлс өөрчлөгдөхгүй.
5.2. Саналд заасан дүн бол Таны данс руу очих нийт дүн мөн. Хуулийн дагуу суутган тооцож төлөх ёстой татвар, хурамжийг Loom өөрөө хариуцан холбогдох байгууллагад төлнө.
5.3. Loom Таны нийтлэл нээлттэй болохыг баталгаажуулсан өдрөөс хойш 7 хоногийн дараа шан хөлсийг дансаар шилжүүлнэ.
5.4. Шан хөлсийг Таны оруулсан банкны данс руу шилжүүлнэ. Дансны мэдээлэл буруу байсан тохиолдолд залруулсан зөв мэдээллийг авсны дараа шилжүүлэг хийгдэнэ.
5.5. Дээрх 7 хоног дуусахаас өмнө нийтлэлээ устгасан, нуусан, архивласан тохиолдолд шан хөлс төлөгдөхгүй.
5.6. Таны шан хөлсний хэмжээ нууц байна. Та түүнийг брэнд, бусад бүтээгч болон олон нийтэд задруулахгүй байх үүрэгтэй.
6. ОЮУНЫ ӨМЧИЙН ЭРХ
6.1. Бичлэгийн Анхны Зохиогч нь Та мөн. Зохиогчийн амины эрх Танд хэвээр үлдэнэ.
6.2. Та брэндэд өөрийн албан ёсны сувгуудаар тухайн бичлэгийг 6 (зургаа) сарын хугацаанд нэмэлт төлбөргүйгээр дахин нийтлэх (repost) органик ашиглалтын эрхийг олгож байна.
6.3. Брэнд бичлэгийг төлбөртэй сурталчилгаа (Paid Ads / Boost)-нд ашиглахыг хүсвэл Танаас тусад нь бичгээр зөвшөөрөл авч, нөхцөлийг тохиролцоно.
6.4. Бичлэг нь Таны өөрийн зохиосон бүтээл байх ёстой. Хөгжим болон бусад хүний бүтээл ашигласан бол Та түүнийг ашиглах эрхийг албан ёсоор авсан, эсхүл Instagram-аас зөвшөөрөгдсөн санг ашигласан байна.
6.5. Брэнд бичлэгийн утга санааг өөрчилсөн эвлүүлэг, засвар хийх эрхгүй.
7. НУУЦЛАЛ БОЛОН ХУВИЙН МЭДЭЭЛЭЛ
7.1. Loom нь Таны нэр, Instagram хаяг, холбоо барих мэдээлэл, банкны данс болон Таны хуудасны нээлттэй үзүүлэлтийг цуглуулж боловсруулна.
7.2. Эдгээр мэдээллийг зөвхөн Танд ажил санал болгох, ажлыг зохион байгуулах, шан хөлс олгох, хуулиар хүлээсэн үүргээ биелүүлэх зорилгоор ашиглана.
7.3. Дансны мэдээллийг зөвхөн төлбөр гүйцэтгэхэд ашиглана. Брэнд Таны дансны мэдээлэл болон шан хөлсний дүнг харах боломжгүй.
7.4. Брэндэд зөвхөн Таны Instagram хаяг, дагагчийн тоо, оролцооны түвшин (engagement rate) болон гурван дээж кадраас бүрдэх мэдээллийг харуулна.
7.5. Хүний хувийн мэдээлэл хамгаалах тухай хуулийн дагуу Та өөрийн мэдээлэлтэй танилцах, залруулах, устгуулах, зөвшөөрлөө буцаан татах эрхтэй.
8. ГЭРЭЭ ДУУСГАВАР БОЛОХ
8.1. Та саналыг татгалзсан, эсхүл 48 цагийн дотор хариулаагүй бол тухайн ажлын санал цуцлагдаж дуусгавар болно.
8.2. Та тохиролцсон хугацаанд бичлэгээ хүргүүлээгүй бол Loom ажлыг дуусгавар болгож, өөр бүтээгчийг томилох эрхтэй. Энэ тохиолдолд шан хөлс төлөгдөхгүй.
8.3. Loom Танд түр хугацаанд ажлын санал илгээхгүй байж болно. Энэ нь Таны өмнөх ажлын түүх болон төлөгдөх ёстой шан хөлсөнд нөлөөлөхгүй.
8.4. Дуусгавар болсон ажил Таны Систем дэх бүртгэлд түүх болон хадгалагдана.
9. ХАРИУЦЛАГА БОЛОН ХАЗААРЛАЛТ
9.1. Та өөрийн бичлэгийн агуулга, зар сурталчилгааны тэмдэглэгээ болон ашигласан бусад оюуны өмчийн эрхийг бүрэн хариуцна.
9.2. Loom нь шан хөлсийг заасан хугацаанд бүрэн төлөх үүргийг хариуцна.
9.3. Аль нэг тал үүргээ биелүүлээгүйн улмаас үүсэх хохирлын хариуцлагын дээд хэмжээ нь тухайн ажлын шан хөлсний дүнгээс хэтрэхгүй.
10. МАРГААН ШИЙДВЭРЛЭХ
10.1. Энэхүү гэрээг тайлбарлах, биелүүлэхэд Монгол Улсын хүчин төгөлдөр үйлчилж буй хууль тогтоомж үйлчилнэ.
10.2. Талууд маргааныг эхнээс нь харилцан тохиролцох замаар шийдвэрлэхийг эрмэлзэнэ. Зөвшилцөлд хүрээгүй тохиолдолд хариуцагчийн оршин суугаа газрын харьяа Иргэний хэргийн анхан шатны шүүхээр шийдвэрлүүлнэ.
11. НӨХЦӨЛД ӨӨРЧЛӨЛТ ОРУУЛАХ
11.1. Энэхүү үйлчилгээний нөхцөл нь хувилбартай байна. Loom шинэ хувилбарыг хэдийд ч нийтэлж болно.
11.2. Таны хүлээн зөвшөөрсөн тухайн ажлын хувилбар өөрчлөгдөхгүй үйлчлэх бөгөөд Та түүнийг хэдийд ч дахин унших боломжтой.
11.3. Шинэ хувилбар нийтлэгдсэн бол Та дараагийн ажил, үйлдэл хийхдээ шинэчлэгдсэн нөхцөлийг хүлээн зөвшөөрнө.